New Suzuki Swift: મારુતિ સુઝુકીની સૌથી વધુ વેચાતી કાર્સ પૈકીની એક સ્વિફ્ટનું નવું મોડેલ કંપની લાવી રહી છે. તેવામાં નવી સ્વિફ્ટના ઈન્ટીરિયરની તસવીરો સામે આવી છે. જેમાં સ્ટીયરિંગ વ્હીલ પર એક જાદુઈ બટન જોવા મળ્યું છે.
નવી દિલ્હી: સુઝુકી મોટર નવી સ્વિફ્ટને જાપાનમાં ટોક્યો મોબિલિટી શોમાં રજૂ કરવા જઈ રહી છે. આ ઇવેન્ટ 26 ઓક્ટોબરથી 5 નવેમ્બર, 2023 દરમિયાન યોજાશે. જો કે આ પહેલા નવી સ્વિફ્ટની ઘણી વિગતો સામે આવી છે. કંપની તેની નવી સ્વિફ્ટમાં મોટું અપડેટ આપવા જઈ રહી છે. તેમાં કેટલીક એવી સુવિધાઓ ઉમેરવામાં આવશે જે અત્યાર સુધી કંપની તેના અન્ય વૈશ્વિક મોડલ્સમાં ઓફર કરતી હતી. એવું માનવામાં આવે છે કે સુઝુકી આ શોમાં સ્વિફ્ટના કોન્સેપ્ટ મોડલને રજૂ કરશે. તેનું પ્રોડક્શન મોડલ 2024માં વૈશ્વિક સ્તરે લોન્ચ કરવામાં આવશે. એવું પણ કહેવામાં આવી રહ્યું છે કે સ્વિફ્ટના સેફ્ટી ફીચર્સ અને સ્ટ્રેન્થમાં સુધારો થશે.
મળતી માહિતી અનુસાર, નવી સ્વિફ્ટના ઈન્ટિરિયરની તસવીરો સામે આવી છે, જેમાં કારના સ્ટીયરિંગ વ્હીલ પર લેન કીપ આસિસ્ટ બટન જોવા મળે છે. અનુમાન લગાવવામાં આવી રહ્યું છે કે નવી સ્વિફ્ટ એડવાન્સ ડ્રાઈવર આસિસ્ટન્સ સિસ્ટમ એટલે કે ADASથી સજ્જ હશે. આ એક પ્રકારની રડાર આધારિત સુરક્ષા સિસ્ટમ છે જે કારને ઇમરજન્સી બ્રેકિંગ, સલામત અંતર અને રાહદારીઓની ચેતવણી જેવી અનેક સુવિધાઓથી સજ્જ કરે છે.
નવી સ્વિફ્ટની ડિઝાઇનની ઘણી વિગતો સ્પાઈ તસવીરો દ્વારા બહાર આવી છે. આમાં નવી પાવરફુલ એલઇડી હેડલાઇટ, ક્લેમશેલ બોનેટ, નવી ફોગ લાઇટ, ફરીથી ડિઝાઇન કરેલ ફ્રન્ટ બમ્પર, નવી એર ઇન્ટેક, નવી ગ્રિલ, નવી ડિઝાઇન કરેલ એલોય વ્હીલ્સ, નવી ડિઝાઇન કરેલ ટેલ લેમ્પ અને રીઅર બમ્પરનો સમાવેશ થાય છે. સ્વિફ્ટને મજબૂત કરવા માટે કંપની દરવાજાઓની ડિઝાઇન અને એન્જિનિયરિંગમાં પણ ફેરફાર કરી શકે છે.
2024માં લોન્ચ થઈ શકે છે
નવી સ્વિફ્ટ ભારતીય બજારમાં 2024ના પ્રથમ છ મહિનામાં લોન્ચ થવાની આશા છે. તેમાં સંપૂર્ણપણે નવું એન્જિન પણ જોવા મળી શકે છે. જો રિપોર્ટ્સનું માનીએ તો તેમાં નવું 1.2 લીટરનું મજબૂત હાઇબ્રિડ પેટ્રોલ એન્જિન આપવામાં આવી શકે છે જેની માઇલેજ લગભગ 35 થી 40 kmpl હશે. હાલમાં, ભારતીય બજારમાં મારુતિ સુઝુકી સ્વિફ્ટની કિંમત 5.99 લાખ રૂપિયા (એક્સ-શોરૂમ) થી શરૂ થાય છે.
નવા ફીચર્સના ઢગલા હશે
મીડિયા રિપોર્ટ્સમાં જાણવા મળ્યું છે કે 2024 સ્વિફ્ટને ઘણા અપડેટ્સ પ્રાપ્ત થશે. તેમાં નવી ફ્લોટિંગ ઈન્ફોટેનમેન્ટ સિસ્ટમ દેખાઈ રહી છે. નવી સ્વિફ્ટમાં વધુ ઇંધણ કાર્યક્ષમતા હોવાનો પણ દાવો કરવામાં આવી રહ્યો છે. ઇન્ટરનેશનલ માર્કેટમાં ટેસ્ટિંગ દરમિયાન પણ તેને ઘણી વખત જોવામાં આવ્યું છે. કંપનીએ તેને ડિઝાઇન કરવા માટે વિકાસલક્ષી અભિગમ અપનાવ્યો છે.
